KALIBO, Aklan—Uman nga nakalista it dugang nga sambilog nga kaso it Delta variant it COVID-19 ro probinsiya it Antique.
Raya ro ginkumpirma sa bombo radyo ni Antique Governor Rhodora Cadiao.
Suno kana nga nabaton nana ro nasambit nga impormasyon may daywang adlaw eon ro nagtaliwan halin sa Department of Health.
Ro dugang nga kaso it Delta variant hay sangka 59 anyos nga babaye nga negosyante halin sa Pandan, Antique.
Nagpositibo imaw sa sakit ko nagtaliwan nga hulyo 8 apang fully recovered eon makaron.
Ginklaru pa ni Governor Cadiao nga bukon raya it kaibahan sa 44 nga gin-back tracing it University of the Philippines – Philippine Genome Center-Visayas sa nakasalamuha it andang daywang naunang kaso ko buean it Mayo.
Madumduman nga sangka mag-asawa nga puro senior citizens ag owa pa nabakunahan ro natumod nga unang kaso it delta variant sa antique kun sa siin ro misis hay namatay samtang ro mister hay nagmayad eon.
Gindugang pa nga owa it history of travel sa guwa it nasyon ro ikatlong kaso it delta variant sa Antique.
Nagapadayun sigon ro maid-id nga contact tracing bukon eamang sa pandan kundi sa kaiping nga mga banwa.
Samtang, bangud sa presensiya it mas makataeapon ag makamaeatay nga delta variant, ginpahayag it Governor nga nagapatigayon sanda makaron it house to house vaccination campaign.
