KALIBO, Aklan—Magapangatubang sa kasong pag-eag sa Presidential Decree 1602 ukon Illegal Gambling Law ro ap-at ka mga babaye matapos nga maaktuhan nga nagasugae it pusoy bahig sa sangka resto bar sa banwa it Nabas.
Ginkilaea ro mga imbolbado nga sanday Dyna Hardenico, 36-anyos it Brgy. Nagustan, Nabas; Camille Nuñez, 22-anyos it Brgy. Naasog, Malay kamana man ro magmanghod nga sanday Jessa, 26-anyos ag Jenny Libuna, 23-anyos it Calinog, Iloilo.
Base sa report, samtang nagaronda ro pulisya hay may nakasugid sigon kanda nga may nagasugae sa nasambit nga lugar rason nga insigida nanda raya nga ginberipika.
Angot kara, naaktuhan gid ro ap-at nga illegal nga nagasugae kon siin narekober sa andang posisyon ag kontrol ro sangka set it baraha ag kapin sa P1,340 pesos nga kantidad it kwarta nga nagaserbe bilang taya.
Ro ap-at hay insigida man nga gindaea sa Nabas Police Station kon siin sanda temporaryong ginkustudiya para sa nagakaigong disposisyon.
