KALIBO, Aklan—Arestado ro ap-at ka mga estudyante it mga pribadong eskwelahan sa banwa it Kalibo matapos nga naaktuhang naga pot session it marijuana kon sa siin sambilog kanda hay subject sa drug buy-bust operation sa sangka resort sa Barangay Tambak, New Washington, Aklan.
Suno kay Police Major Frensy Andrade it Provincial Drug Enforcement Unit (PDEU)-Aklan, ginkilaea ro mga suspek nga sanday Robby Prayl Tabulinal y Doque, 20-anyos residente it Brgy. New Buswang, Kalibo; Von Gielo Ambrocio y Rebenito, 19-anyos it Brgy. Ambulong, Batan; Kenno Dave Dela Torre y Supetran, 19-anyos, residente it Brgy. Manocmanoc, Boracay ag Angelo Vrian John Agustin y Pabayo, 23-anyos it Brgy. Lanas, San Jose, Romblon.
Ginpahayag dugang ni P/Major Andrade nga si Tabulinal ro subject sa operasyon nga ginpatigayon it Aklan PPO PDEU, New Washington PNP, Philippine Drug Enforcement Agency (PDEA) ag Highway Patrol Group (HPG).
Narekober kay Tabulinal ro tatlong ka sachet it marijuana kabaylo it P3,000 nga buy-bust money.
Suno pa kay P/Major Andrade, makabig si Tabulinal nga pinakamabahoe nga supplier it marijuana sa probinsya it Aklan kon sa siin ro mga parokyano kara hay mga kaparehong estudyante.
Online suno kana ro transaction it suspek ag sa mga kaeapit nga probinsya ag syudad imaw nagabueo it supply.
Samtang, naaktuhan man nga ro tatlong iba pa hay nakipagtransaction kana kon sa siin naabutan sanda nga nagabatak it nasambitan nga marijuana samtang naga-inuman.
Ro mga suspek hay posibleng magapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002.
