KALIBO, Aklan—Igapaidaeum sa inquest proceedings sa lunes nga adlaw ro ap-at nga mga suspek sa pag-eabag sa kasong PD 1602 ukon Illegal Gambling Act sa banwa it Makato.
Raya hay kasunod sa pagka-aresto sa tatlong indibidwal nga nadakpan sa aktong nagahampang it tong-its sa sueod it sangka baeay nga gina-alegar nga ginagamit nga pasugaean sa barangay Tugas, Makato.
Suno kay P/Major Willian Aguirre, hepe it Makato Municipal Police Station nga kaibahan sa ginkasuhan ro tag-ana it baeay bangud sa pagpagamit kara sa anang baeay nga pasugaean ag gina-alegar nga nagabaton it “tong”.
Narekober sa operasyon ro masobra sa 1,900 pesos nga pusta ag sangka set it baraha.
Gindugang pa ni Major Aguirre nga matapos nga makabaton it impormasyon nga may nagasugae sa nasambit nga lugar hay insigidang ginpahueag kara ro anang mga tawuhan ag ginkasa ro operasyon nga naging rason sa pagkadakop sa mga suspek.
Owa eon suno kana ginpangaeanan ro mga raya base sa hinyu it andang mga pamilya.
Kapin sa 30,000 pesos kada isaea ro piyansa sa nasambit nga kaso, apang pagabuligan sigon nanda nga raya hay mapanaba.
Samtang, uman nga nagpadumdum si Major Aguirre sa publiko nga hugut nga ginabawae ro pagsugae eabi eon makaron nga pandemya bangud nga kaeabanan raya nga naga-eabag it physical distancing.
Kaibahan man sigon sa andang ginatutukan sa banwa it Makato hay ro mga nagapatigayon it tupada ukon illegal cockfighting.
