KALIBO, Aklan — Ap-at ro naninahan matapos nga magbueungguan ro daywang motorsiklo sa Brgy. Alas-as, Madalag.
Suno sa 34-anyos nga si Rey Valdez, residente it Brgy. Panipiason sa nasambit nga lugar nga angkas nana ro estudyanteng si Aljin Apolinario, 16, nga taga Brgy. Medina, Madalag agud nga ihatud kunta sa eskwelahan kat owa napan-uhan ro kasub-eang nga motor sa blind curve nga daeanon paguwa it barangay road halin sa feeder road.
Maskin nga pilit nga naglikaw hay nabungguan gihapon kara ro motor nga ginamaneho ni James Nervar, 48, residente it Sitio Libas sa nasambit nga barangay angkas ro anang misis nga sa mayad nga swerte hay owa masyadong nalastruhan.
Gindaea eagi sa provincial hospital ro mga biktimang sanday Valdez ag Apolinario nga makaron hay nagapabilin sa Intensive Care Unit (ICU) bangud sa fractured nga gusok ag iba pang lastro sa eawas kamana man ro mag-asawang Nervar, apang matapos nga mabueong hay insigidang nakaguwa sa ospital.
Sa pag-usisa it kapulisan, owa masyadong nagapangot ro preno it motor ni Valdez.
Presente pa nga naga-istorya ro daywang grupo agud nga makaangkon it kasugtanan ko sin-o ro magabayad sa nasamad nga mga motor nga presenteng sa kustodiya it Madalag Police Station kamana man ro mga gastos sa ospital.
