Kapin sa ap-at nga person of interest ro ginabuytan makaron nga lead it Numancia Municipal Police Station base sa andang nagapadayon nga maid-id nga imbestigasyon sa kaso ni Jack Mererague, 41-anyos it Brgy. Guibongan, Miag-ao, Iloilo nga nasapwan nga nakaputos sa bed sheet ag tadtad it pagbuno sa nagkaeain-eain nga parte it eawas ag ginpilak sa kilid it karsada nga sakop it Brgy. Albasan, Numancia ko adlaw it Biyernes.
Suno sa imbestigador nga si PCpl. Arjoren Mendoza, base sa bueo it mga cctv cameras, ap-at katawo ro nakit-an nga imbolbado sa krimen kon siin ro tatlo kara hay nakasakay sa tapdown ag ro sambilog hay nagmaneho it motorsiklo it biktima nga nakit-ang gin-abandona sa Brgy. Tigayon, Kalibo.
Nakit-an dugang sa pila ka mga anggulo nga nagsakay it tricycle ro tatlo paadto sa direksyon it banwa it Banga samtang ro sambilog sa mga raya hay nagmaneho it tapdown pabalik sa direksyon it banwa it Kalibo ag nakaagi pa sa Kalibo-Numancia bridge.
May mga pangaean eon sigon ro otoridad sa tatlong ka mga indibidwal apang inde pa nanda raya maipaguwa sa kahanginan bangud nga uwa pa it may nagaguwa nga witness sa krimen ag uwa pa sanda it kongretong ebidensya.
Nasayuran nga si Mererague hay haeos daywang dag-on eon nga uwa nakauli sa anang pamilya sa probinsya it Iloilo kon siin ro ulihi sigon nana nga eaong hay mausoy it trabaho.
Ginkakibot eon lang it anang pamilya nga nasapwan imaw nga patay sa probinsya it Aklan.
