KALIBO, Aklan—Kasunod it amat-amat nga pagbuhos it mga turista sa isla it Boracay sa pag-umpisa it “bermonths”, nagaabo man ro mga pasaway nga dumueoong nagaeabag sa mga ordinansa it banwa it Malay, Aklan.
Raya hay matapos nga maaktuhan ro daywang Chinese national nga ginkilaeang sanday Zhang Zhi, 30, ag Hao Yueran, 35 it Malay Auxiliary Police nga nag-ihi sa front beach it Station 3, Barangay Manocmanoc, sa nasambitang isla.
Ro daywa hay gin-isyuhan it citation ticket sa pag-eabag sa Municipal Ordinance No. 311 Series of 2012 ukon An Ordinance Prohibiting Littering/Dumping/Throwing of Garbage, and Other Waste Materials and Prescribing Penalties for Certain Acts and Ommissions Inimical to Cleanliness and Sanitation.
Sa pihak nga parte, uwa man ginpaeampas it mga enforcers ro daywang Koreano kat madakpan nga naga-inom it aeak sa binit it baybayon.
Ginkilaea ro mga dumueoong nga sanday Changhyeok Lee ag Choi Rack Hyun, parehong sa legal nga edad ag presenteng nagabakasyon sa isla.
Ro daywang bakasyunista hay gintikitan man sa pag-eabag sa Municipal Ordinance No. 319 Series of 2012 ukon An Ordinance Prohibiting the Carrying or Clutching of Glass Bottles of Any Beverage in the Beaches of Boracay Island.
