Maskin nga sa Oktubre pa ro gintaeana nga Barangay ag Sangguniang Kabataan Elections, makaron pa eang hay nagapahaum eon ro mga awtoridad.
Kadungan kara ro padayun nga pagtutok it Commission on Elections (Comelec) sa “Task Force Kontra Bigay” kontra sa maeapnagon nga vote buying kada tiempo it eleksyon.
Indi maitago nga halin kato hasta makaron hay may nagakatabu gihapon nga vote buying.
Pasdayon nga ginatinguhaan it nasyon nga makaangkon it tampad ag malimpyo nga eleksyon.
Rason nga dapat eang nga magadere-deretso ro pakikipag-angot it poll body sa Philippine National Police (PNP).
Kon nagiging madiskarte ro mga eakot sa vote buying, dapat nga maging mas madasig ro pag-aksyon it natungdan kontra kanda.
Bukon eon it hinangae ro vote buying sa atong nasyon.
Raya hay matsa sakit eon nga indi mabo-oe sa sistema ag mas pang naga-grabe.
Sa makaron hay gina-draft eon sigon it Task Force Kontra Bigay ro mga bag-ong sueundanan nga igapatuman kontra sa vote buying kun sa siin ginaeauman nga sa masunod nga mga binuean hay igapaguwa eon ag magiging kabulig ro PNP ag Armed Forces of the Philippines (AFP) sa pagpatuman it laye.
Ro sambilog pang hangkat, dapat nga magapanabat ro sin-o man nga mapamatud-an nga daeahig sa vote buying.
Siguraduhon nga makasuhan ag indi makaeusot.
Gusto man naton nga ipadumdum nga mas mabug-at ro hangkat sa mga botante.
Indi masilaw sa kwarta agud nga indi mag-antus.
Ro kantidad nga ginapanupod it mga kandidato hay madali man lang nga maubos kumpara sa haba it tiempo nga pagahinoesuean ro pagbutang kanda sa puwesto bangud nga padayun eang ro pagpangloko ag korupsyon.
