KALIBO, Aklan–Ginkumpirma it Aklan Police Provincial Office ukon APPO nga masobra sa 20 ka mga indibidwal ro naaresto it pulisya sa andang anti-illegal gambling operation ko adlaw it Miyerkules sa banwa it Kalibo.
Suno kay PSSgt. Jane Vega, tagapaghambae it Aklan PPO nga ro nasambit nga operasyon hay ginpangunahan it regional intelligence division it Police Regional Office VI kabulig ro Aklan PPO ag Kalibo Municipal Police Station.
Ro nasambit nga mga persona hay illegal nga nagapataya ukon ro mga illegal nga bookis sa peryahan ng bayan ag small town lottery.
Ginpahayag dugang ni Vega maabo ro mga narekober sa mga raya kon siin ro andang kaso hay una eon sa korte para sa nagakaigong disposisyon.
Apang, ro iba sa mga raya hay nagpyansa para sa andang temporaryong kahilwayan.
Samtang sa pihak nga parte, uman nga gin-insister it pulisya nga uwa it kamatuoran ro puting van nga nagalibot ag napasakay it mga inonga.
Raya hay kasunod sa nauna eon nga nagviral sa social media nga ginpost it sangka ginikanan sa may bahin it banwa it Balete nga nagtuga it alarma sa mga netizen.
Suno kay PSSgt. Vega, sa nabueo nanda nga impormasyon ro ginatumod nga puti nga van hay ro mga nagakaayad it wifi connection apang inde sigon mabasoe ro ginikanan bangud nga naging alerto eamang raya ag normal nga reaksyon sa makarundaya nga sitwasyon.
