KALIBO, Aklan—Kasunod it selebrasyon it International Women’s Day makaron nga adlaw, uman nga gintaw-an it importansya it Aklan Police Provincial Office (APPO) ro kinamatarong it mga kababayin-an.
Suno kay PSSgt. Jane Vega, tagapaghambae it APPO nga ginataw-an it prayoridad it taeatapan nga ma-intensify ro mga kababayin-an para makaangkon it kaugalingon nga panindugan ag desisyon.
Nagabulig man sigon sanda nga ma-empower ro mga unga ag babaye nga biktima it pag-abuso.
Dapat sigon nga makaangkon it boses ro mga babaye nga una sa abusive relationship nga ipakigbato ro andang kaugalingon.
Gin-engganyo man kara ro mga kababayin-an nga magpasaka it nagakaigo nga kaso para mataw-an it hustisya ro pagtapak sa andang pagkatawo.
Ginpasiguro man kara nga haum ro taeatapan para magbulig ag magtao it nagakaigo nga laygay para mabuligan ro mga biktima it pagpang abuso nga maibangon ro andang dignidad ag reputasyon sa komunidad.
Ginapahayag nga maabu nga kaso it pag-abuso sa tanan nga aspeto sa probinsya it Aklan apang sangkiri eamang ro nagapanikasog nga magreklamo.
