KALIBO, Aklan—Ginahinyu it Aklan Police Provincial Office ukon APPO sa Department of Education ukon DepEd-Aklan nga makipag-angot kanda sa ensaktong petsa it pagpatigayon it Western Visayas Regional Athletic Association ukon WVRAA meet 2020.
Sa pihak kara, ginpasiguro ni P/Staff Sgt. Jane Vega, tagapaghambae it APPO nga haum eon ro mga kapulisan sa Aklan para sa pagahiwaton nga pinakamabahoe nga dag-unan nga sporting event sa rehiyon.
Nauna eon nga ginkumpirma it DepEd sa Bombo Radyo nga ro regional sports competition hay maga-umpisa eon sa Marso 21 hasta 28 nga may tema makaron nga dagg-on nga “Region 6 Sustaining School Sports Supremacy”.
Igapaidaeum sigon eon sa full alert status ro kapulisan ag ro andang security plan para kara hay kasado eon.
Maga-deploy suno kana it mga police personnel agud nga masiguro ro seguridad it mga billeting areas kamana man ro kaeowasan it mga delegado ag participants eabi eon ro mga tempranong maga-aeabutan, kun sa siin round-the-clock ro andang pagbantay.
Maga-augment sigon sa APPO ro police force halin sa nagkaeain-eain nga municipal police stations, national support unit kapareho it highway patrol group ag 1st and 2nd provincial mobile force company.
Target sigon nanda nga maangkon ro maayos, owa it kriminalidad ag owa it casualty sa event.
Gindugang pa ni Vega nga mas pang pagapabaskugon ro foot ag mobile patrol, police visibility sa mga sporting sites ag iba pang mga lugar nga magadagsa ro tawo ag ro pagpatigayon it checkpoints ag pagbantay sa daeagan it trapiko.
Pagahinyu-on man sigon nanda ro bulig it mga Barangay Peacekeeping Actions Teams ukon BPATs, barangay tanod ag iba pang volunteer groups bilang nagapangunang multipliers para sa peace and order ag security measures.
Nasayuran nga nagdesisyon ro regional management committee it department of education region 6 nga padayunon eon ro pagpatigayon it WVRAA Meet matapos raya nga makansela kan-o eamang bangud sa coronavirus outbreak.
Ro pahampang hay nakataeana kunta ko Pebrero 15 hasta 22.
