KALIBO, Aklan—Kasado eon ro preparasyon it Aklan Police Provincial Office sa nagahilapit nga paskwa ag bag-ong dag-on.
Suno kay P/Capt. Willian Aguirre , officer-in-charge it Provincial Intelligence Branch nga mas pa nanda nga ginpabaskog ro andang security plans sa idaeum it andang programang Oplan Ligtas Pasko.
Mas pa suno kana nga pagapabaskugon ro tanan nanda nga police operations, kun sa siin maskin ro andang mga personnel sa opisina hay kinahangean nga magtaeana it maskin ap-at nga oras sa field agud nga madugangan ro numero it mga pulis nga iga-deploy sa tuyo nga mabatyagan ro presensiya it kapulisan eabi eon sa pag-umpisa it simbang gabi.
Mag-eowas kara, magataeana man sanda it mas maabu nga mga checkpoints ag magapatigayon it Oplan Sita partikular eon sa mga lugar nga ginaeauman nga magabuhos ro tawo agud nga mapadumdum sa social distancing , pagsuksok it face masks, pagbantay sa mga kagamitan agud nga malikawan nga mabiktima it mga kawatan.
Nagpanawagan man si P/Capt Aguirre sa mga pumueuyu it kooperasyon ag suporta agud nga magapabilin nga eowas ag maayos ro selebrasyon it kapaskwahan.
Sa pihak nga parte, nagahueat man sigon sanda it go signal sa national headquarters antes nga magapatigayon it ceremonial sealing it andang mga baril agud nga malikawan ro indiscriminate firing.
