KALIBO, Aklan—Mas pang ginpabaskog it Aklan Police Provincial Office ukon APPO ro kampanya kontra sa illegal gambling.
Raya hay kasunod it napabalita nga maskin nga balik operasyon eon ro mga lisensiyadong bueangan sa Aklan hay may mga nakakalusot sa gihapon nga nagapatigayon it patupada ukon illegal cockfighting sa mga kabaryuhan.
Angot kara, ginpahayag ni P/Capt. Willian Aguirre nga kaibahan ro PNP sa monitoring kon ginasunod ro health and safety protocols it Inter-Agency Task Force kamana man ro implementing rules and regulations nga ginpaguwa it department of the interior and local government ukon DILG sa sueod it mga bueangan.
Nakadepende man sigon sa lokal nga gobyerno ro pagdesisyon sa scheduling it mga bueangan.
Ginklaru pa it opsiyal nga nagapabilin nga bawae ro mga pulis nga magsueod sa bueangan kun sa siin hay magapangatubang sanda sa kasong kriminal ag administratibo.
