KALIBO, Aklan—Aminado ro Aklan Police Provincial Office ukon APPO nga may monitoring sanda sa mga peke nga accounts sa facebook.
Raya hay kasunod it mga sunod-sunod nga reklamo it mga facebook user nga may mga dummy accounts sanda nga nakit-an sa higante nga social media flatform.
Ginpaathag ni P/Staff Sgt. Jane Vega, tagapaghambae it APPO nga posibleng magamit sa pagpangloko ro andang mga fake accounts nga uwa it kasayuran ro mismong facebook user.
Kaangot kara, gin-engganyo ni PSSgt. Vega ro publiko nga magsikyar it mga establish hotline numbers it pulisya agud nga insigidang makapaabot sa andang reklamo.
Nagapati si Vega nga sa inde magbuhay masakote eon ro mga inbidwal nga nagahimo it dummy accounts agud nga gamiton sa pagpamentaha sa andang isigkatawo.
Kinahang-ean suno kana nga maging vigilante ro publiko pag-abot sa paggamit it andang social media accounts ag kaantiguhan man sanda nga magprotekta sa andang kaugalingon nga account bangud nga nakasalalay dikara ro personal information nga pwedeng magamit sa mga illegal nga hilimuon.
Nasayuran nga ro ano mang intentional acquisition, use, misuse, transfer, possession, alteration ukon deletion it identifying information nga ginapanag-iyahan it iba raya man hay natural ukon juridical ag maskin uwa it nahimo nga damage sa bahin it user hay ginakabig nga krimen partikular ro Computer-related Identity-Theft.
Pag-eabag raya sa Section 4 it R.A. No. 10175 ukon ro Cybercrime Prevention Act of 2012.
Ro sin-o mang mapamatud-ang guilty sa nasambit nga pag-eabag hay makulong it an-om hasta 12 anyos.
Kinahang-ean man nga magmulta ro akusado it hasta sa P200,000 pesos.
