KALIBO, Aklan—Nagapadayun ro “all-out war” it Aklan Police Provincial Office ukon APPO kontra sa iligal nga bueang ag iba pang sugae sa probinsiya.
Suno kay P/Major Willian Aguirre nga padayun nga nakabantay ro mga lokal nga gobyerno ag kapulisan sa operasyon it mga cockfighting arena matapos nga ginmandu it gobyerno ro temporaryong pagsuspinde kara maskin sa mga lugar nga sa idaeum it general community quarantine (GCQ) ag modified general community quarantine (MGCQ) agud nga matapna ro pagkalhit it coronavirus sa nasyon.
Gindugang pa ni Major Aguirre nga nakabaehag sa PD 1602 nga ro mga bueo-bueo, cara cruz, ending, game fixing, card games, dice games, illegal online games ag tanan nga sugae nga may “money involved’ hay ginakabig nga iligal ag pwedeng dakpon it mga awtoridad ro mga nagataya , nagapataya ukon nagahampang it nasambit nga mga sugae.
Maskin suno kana sa mga namatyan hay ginasita ro mga nagapatigayon kara bangud nga kon amat hay halipatan eon ro social distancing.
Samtang, nagapasaeamat man si Major Aguirre sa mga pumueuyu nga nagatau it impormasyon sa mga nagapatigayon it iligal nga aktibidad sa andang natungdan nga mga barangay.
