KALIBO, Aklan–Nagatipon eon it mga datus ro Aklan Police Provincial Office ukon APPO kon may mga politiko sa probinsiya nga nagapameligro ro kabuhi.
Suno kay P/Staff Sgt. Jane Vega , Assistant PIO it APPO nga raya hay matapos nga mabaton ro direktiba ni PNP chief P/Gen. Rodolfo Azurin Jr., nga nagamandu sa tanan nga mga police regional directors nga magpatigayon it threat assessment sa mga politiko sa andang nasakupan.
Ginpaathag ni Vega nga nagahueag eon ro mga tawuhan it provincial intelligence kabulig ro mga nagkaeain-eain nga municipal police stations sa aklan agud nga masayuran kon sin-o sa mga politiko ro nagapameligro ro kabuhi agud nga makapatuman it nagakaigo nga security precautions.
Raya hay matapos ro sunud-sunod nga natabu nga pagpang-ambush sa pilang mga politiko sa nasyon.
Maskin nga ro bilog nga probinsiya hay nagapabilin nga malinong apang may sangka kaso eon sanda nga nai-record dati kun sa siin nagtaeana it pilang police officer agud nga magserbing close-in security it sangka politiko nga gina-alegar nga may death threat.
Pwede suno raya nga aplayan, apang nagakinahangean it mga documentary requirements ag ro approval hay magahalin sa kampo krame.
Sa makaron hay owa sigon it nailistang mga insidente it pagpang ambush sa mga politiko sa Aklan maskin ko nagtaliwan nga eleksyon.
