KALIBO, Aklan—Uman nga nagpaandam si Police Major Willian Aguirre it Aklan Police Provincial Office (APPO) sa publiko angot sa nagakalhit makarun nga nagkaeain eain nga investment scam.
Sambilog eun kara ro sikat ag puno it kontrobersiya makarun nga “double your money scam ” sa probinsya it Capiz kung sa siin suno kay P/Maj. Aguirre hay maabo man ro mga kapulisan ro nag-invest sa pageaom nga maibalik it doble ro andang kwarta sa adlaw nga gintaeana para sa pay out.
Madumduman nga unan eun nga gindeklara it Securities and Exchange Commission (SEC) Region 6 nga sangka iligal ukon investment scam ro operation it Chiyuto Creative Wealth Document Facilitation Services ukon Chiyuto Double Your Money Scheme.
Ro nasambitan nga kompaniya hay ginadumaeahan ni Patrocenio Chiyuto ukon mas kilaea sa tawag nga Don Chiyuto sa probinsya it Capiz.
Modus it nasambitan nga kumpaniya ro pag-engganyo sa mga tawo nga mag-invest it kwarta kung sa siin magadoble raya pagkatapos it 30 diyas.
Maabo eun man ro nabiktima it Chiyuto Creative Wealth Document Facilitation Services ag ro iba kara hay sa una eamang ginataw-an it payout apang ko ulih hay gulpi eang nga nagakaduea ro kwarta nga gin-invest.
Sa makarun hay naka red flag eun ro kumpaniya sa Securities and Exchange Commission ag indi eun pwedeng makabo-oe it permit bangud sa ginapahayag nga eapnagon nga pagpangloko.
