KALIBO, Aklan — Nagpaandam ro Aklan Police Provincial Office ukon APPO kontra sa mga nagakalhit nga online lending company nga kaeabanan nga makita sa social networking sites kapareho it Facebook.
Suno kay P/Corporal Jane Vega, tagapaghambae it APPO nga dapat nga magdahan ro publiko bangud nga maabu eon ro nabiktima it modus operandi it mga pekeng online lending company.
Raya sigon nga app hay gina-install sa cellphone.
Pila suno kana sa mga biktima hay naengganyo nga mag-utang matapos nga makita ro comments nga madasig magpautang ro kompaniya.
Sa oras sigon nga makabayad it processing fee para sa gina-utang nga kwarta hay kaeabanan nga gina-block ro biktima sa account it credit company hasta nga maga-deactivate eon raya .
Samtang, pila man sa mga nabiktima sa Aklan hay nakaexperiensiya it grabeng kahuy-anan matapos nga ma-delay sa pagbayad it monthly amortization.
Haeos tanan sigon nga friends sa FB ukon mga pangaean sa phonebook it nag-utang hay ginapadaehan it mensahe angot sa anang utang nga owa pa nabayaran nga haeos mawad-an eon it dignidad.
Ginlaygay pa ni Vega nga maging madahan sa paggamit it mga smartphones.
