KALIBO, Aklan—Ginpabugae it Aklan Police Provincial Office ukon APPO nga antes pa man ro hugut nga implementasyon it body mass index ukon BMI evaluation hay naka-umpisa eon sanda it intervention program para sa mga “obese policeman” ukon mga pulis nga sobra sa timbang.
Suno kay P/Staff Sgt. Jane Vega, tagapaghambae it APPO nga sigidas ro andang weight loss program nga nag-umpisa ko nagtaliwan pa nga dag-on.
Ro BMI evaluation sigon hay kaparte man gihapon it internal cleansing program it Philippine National Police.
Sa ideaum kara, ro mga pulis nga underweight ukon kueang sa timbang hay ginarekomendang mag-gain it timbang it sang kilo hasta tatlong kilo kada sang buean hasta nga maangkon ro andang ideal weight.
Samtang ro mga obese policeman man hay ginapabawas it timbang it daywang kilo kada buean.
Ro sin-o man nga indi makasunod sa mandu hay may nagakaigo nga penalidad.
Kaibahan eon kara ro pag-angkon it promotion sa masunod nga ranggo, indi maka-schooling.
Sa APPO suno kana maabu eon nga kapulisan ro nagbawas it timbang.
Maskin sigon ro Police Regional Office 6 nga nagpatigayon it physical fitness test sa APPO hay gindayaw ro andang programa bangud nga ro Aklan ro may potensiyal sa bilog nga Region 6 nga nakasunod sa BMI evaluation.
