KALIBO, Aklan–Owa it nailista nga anumang election-related incident ro Aklan Police Provincial Office (APPO) kasunod it ginpatigayun nga May 9, 2022 national and local elections.
Ginpahayag ni Police Lieutenant Colonel Norlan Perante, Chief operation it APPO nga kabilugan nga naging matawhay ro eleksyon sa bilog nga probinsya.
Hugut sigon ro andang ginhimo nga pagbantay ag monitoring pinaagi sa gintukod nga Provincial election monitoring center kaibahan ro mga natungdan nga ahensya it gobyerno.
Ginpabugae man ni Perante ro andang accomplishment sa banwa it Malay matapos madakpan ro ap-at ka mga persona nga nag-eabag sa liquor ban.
Samtang, owa man sigon sanda it nabaton nga pormal nga reklamo angot sa gina-alager nga vote buying apisar nga maabu ro nagapa-abot it concern partikular sa social media.
Dapat suno kana nga magdihon it pormal nga reklamo sa estasyon it pulisya kaibahan ro mga ebidensya nga nagapamatuod it pagpamakae it boto it sangka politiko ukon partido.
