KALIBO, Aklan—Padayon sa gihapon ro pagtutok it Aklan Police Provincial Office ukon APPO sa andang kampanya kontra iligal nga droga.
Suno kay P/Lt. Col. Frenzy Andrade it Provincial Drug Enforcement Unit ukon PDEU nga dere-deretso ro andang pagpatigayon it andang kampanya kontra droga matapos nga nataeupangdan nga pabata nga pabata makaron ro mga user ag mga pusher.
Mag-eowas kara pilang mga drug surrenderee man ro gina-monitor sa uman nga pagduso kara.
Angot kara, nag apela si Lt. Col. Andrade sa mga ginikanan nga buligan sanda sa pagbantay sa andang mga unga agud nga indi magtaeang it daean nga paga-agihan.
Pwede man suno kana nga makipag-angot sa mga kapulisan kon mataeupangdan nga eakot ro andang mga unga sa illegal nga aktibidad.
Mas madali sigon makaron ro komunikasyon rason nga maskin ro cellphone it mga inunga hay kinahangean nga mausisa eabi eon ro andang mga social media account.
Samtang, kaabuan suno kana sa naga-circulate makaron nga droga sa Aklan hay ro marijuana nga ginabakae halin sa ibang mga probinsiya.
