Ginpahayag it Aklan Provincial Police Office (APPO) sa ginhiwat nga press conference kahapon nga adlaw it Myerkules, Hunyo 24 nga dapat nga atubangon ro mga kaso it bullying sa mga eskwelahan pinaagi sa nagakaigo nga interbensyon agud mapunggan ro mas grabeng mga insidente.
Suno kanda, may kaugalingon nga mga polisiya ag disiplina ro mga eskwelahan para sa mga estudyanteng nai-imbolbar sa bullying.
Padayon man ro andang pagpatigayon it school visitation, dialogue ag information drives kaibahan ro programa nga “My Police Officer, My Teacher” sa koordinasyon it mga school head ag maestro.
Ginapatuman man sigon ro counseling ag intervention programs kaibahan ro DSWD ag mga ginikanan agud matur-an ro mga kabataan.
Dugang pa kara, suportado man sigon it andang taeatapan ro ginaproponer nga pagpanaba it age limit sa crime responsibilities, agud nga mag-serbeng paandam raya sa mga inunga ag masayuran nanda ro posibilidad it pag-sabat sa andang paga-himuon nga saea.
Ginrekomenda man nanda ro seguridad sa mga eskwelahan pinaagi sa pagdugang it security guards sa mga mabahoe nga campus agud mas mapabaskog ro proteksyon sa mga estudyante ag mga manugturo.
Ginpahayag man nga mas ginpabaskog ro koordinasyon sa tunga it mga school head ag kapulisan matapos ro natabo nga insidente sa Tacloban City.
Dugang pa, maga-initiate ro kapulisan it simulation drills ag training para mataw-an it kasayuran ro mga school officials ag mga estudyante kun ano ro pwedeng ubrahon ingkaso nga magtuhaw ro mga kaparehong insidente.
Ginpahayag man it mga opisyal nga bangud sa kaabo it mga eskwelahan, indi raya kayang bantayan sa tanan nga oras it kapulisan kaya kinahangean ro pag-hiliugyon it komunidad, mga eskwelahan ag iba pang ahensya para masikyar ro kaeuwasan it mga estudyante ag manugturo.
