KALIBO, Aklan–Suportado it Aklan Provincial Police Office (APPO) ro naging pinal nga desisyon ni Pangueong Rodrigo Duterte angot sa pagsuspendi it operasyon it Online sabong ukon e-sabong sa bilog nga nasyon.
Ginpahayag ni PMAJ. Willian Aguirre it Provincial Intellegence Unit it APPO nga ginahueat lang nanda ro igapapanaog nga sueundanan it Department of the Interior and Local Government (DILG) may kaangtanan sa e-sabong.
Suno pa kay Aguirre nga kinahang-ean eon nga punduhon ro nasambit nga sugae bangud sambilog raya sa ginapangatubang it nasyon nga mabahoe nga problema partikular sa pamilya it sangka manughampang.
Madumduman nga nag-umpisa ro imbestigasyon sa e-sabong bangud sa 32 missing nga mga online sabongero nga nauna eon nga ginreport.
Nasayuran nga ro e-sabong hay makabig nga grabeng bisyo partikular sa mga manughampang nga indi eon makontrol ro andang kaugalingon sa pagtaya.
