Kalibo Aklan——-Ginapadahan it Aklan Police Provincial Office (APPO) ro publiko kontra sa love scam ag iba pang online scam nga ro tuyo hay makabo-oe it kwarta .
Suno kay P/Capt. Willian Aguirre, OIC it Provincial Intelligence Unit nga makasueubo bangud nga maskin nga eapnaag eon ro nasambit nga scam hay may una sa gihapon nga mga nabibiktima kara .
Kaeabanan suno kana nga modus it love scam nga gina-diskartehan anay ro mga pagabiktimahon pinaagi sa social media.
Sa oras nga mahueog eon ro baeatyagon hay magapakuno-kuno nga magapadaea it package ag dikara eon maga-umpisa ro pagpangayo it kwarta .
Angot kara, ginlaygayan ni Capt Aguirre ro mga nabiktima it kapareho nga mga scam nga magdangop sa Cyber Crime Division it Criminal Investigation and Detection Group (CIDG).
Samtang, aminado man si Capt. Aguirre nga uso makaron nga tiempo ro hacking bangud sa kaabuon it tawo nga nagagamit it social media.
Mag-eowas sa kwarta , iba sa mga raya hay nabiktima it identity theft matapos nga gamiton ro andang litrato sa pagpangloko.
Bangud kara, naga-apela imaw sa publiko nga siguraduhon nga secured ro mga Facebook ag iba pang social media accounts.
Samtang, ro iba pa sigon nga modus hay ro paggamit it pangaean it mga kilaeang personalidad kapareho sa natabu sa pilang mga alkalde nga ginpangayuan it cellpbhone load it nagpakilaeang si Aklan Provincial Director P/Col Esmeraldo Osia Jr.
