KALIBO, Aklan–Aprubado eon it Sangguniang Bayan it Kalibo ro sangka resolusyon nga nagatau it awtoridad kay mayor Emerson Lachica nga magbakae it Covid-19 vaccines kon maging available eon raya sa nasyon.
Suno kay mayor Lachica nga bangud kara hay makaangkon eon imaw it kahigayunan nga makasueod sa confidentiality agreement sa AstraZeneca, sangka british pharmaceutical company sa pagbakae it bakuna.
Importante suno kana nga makaangkon it bakuna sa mas madali nga tiempo agud nga indi eon mag-inabu pa ro Covid-19 cases sa banwa.
Angot kara, gin engganyo man ni mayor lachica ro mga barangay captains it kalibo nga magpahaum eon it listahan it mga recipients para sa vaccination program.
Tuyo kara nga matumod kon pilang doses it bakuna ro pagabak-eon para sa 1st phase.
Ginpasiguro man nana nga planchado eon ro andang vaccination plan sandig man sa rekomendasyon it inter-agency task force ag ko Department of Health.
