KALIBO, Aklan–Nakasumite eon it incident report si Aklan rehabilitation center ukon ARC jail warden Pedrito Escarilla kay Governor Florencio Miraflores may kahilabtanan sa pag-eabu-patay it sangka inmate sa anang kaparehong preso ko nagtaliwan nga adlaw.
Suno kay Aklan Provincial Administrator Selwyn Ibarreta nga maskin nga naaksyunan eon it Kalibo Police Station ro insidente ag napasakaan eon it kasong murder ro suspek nga si Art Tumbukon hay magapatigayon gihapon sanda it separadong imbestigasyon partikular ro pag-angkon it sanduko it suspek.
Madumduman nga namatay samtang ginabueong sa Aklan provincial ro biktimang si Rommel Tambong matapos nga gin-eabo it kapin sa tatlong beses sa anang ueo samtang nga nagakatueog sa andang selda.
Ginasugid nga naakig si Tumbukon kay Tambong matapos nga isugid kara sa iba nanda nga kaibahan nga may ginagamit imaw nga cellphone hasta nga ginkumpiska raya it mga gwardiya it ARC.
Hugut nga ginabawae ro anuman nga gadget sa sueod it nasambit nga jail facility.
Ginpahayag dugang nga ro sanduko hay ginagamit sa paglimpyo sa palibot it ARC ag nakatago raya sa storage room.
Nakulong ro suspek bangud sa kasong murder ag frustrated murder.
