KALIBO, Aklan — Maid-id nga gin-usisa si Aklan Rehabilitation Center (ARC) jail warden Pedrito Escarilla sa committee hearing nga ginpatigayon it Sangguniang Panlalawigan.
Raya hay kaangot gihapon sa pagka-eskapo it daywang ka inmates kon siin unang naka-takas si JR Isuga Ruiz nga may kasong rape samtang nagapatigayon it religious activity sa compound it pasilidad apang makataliwan ro pilang adlaw hay gilayon man nga nadakpan sa Brgy. Cabayugan, Malinao.
Samtang, si Jose Tropa nga may kasong murder hay padayon gihapon nga ginatugis matapos nga naka-eskapo sa anang bantay samtang nagabalik iya sa probinsya it Aklan halin sa court hearing sa Manila.
Suno kay Escarilla, haeos adlaw-adlaw ro ginapaino-ino it mga inmates hay kon paano sanda maka-eskapo sa pasilidad.
Nakaangkon sigon it tyansa si Ruiz samtang ro tanan hay nagapangamuyo partikular ro mga jail guards nga ginasikyar ro seguridad it pari.
Sa pihak nga parte, gindepensahan ni Escarilla ro anang kaugalingon matapos nga owa sigon imaw naimpormahan sa pagdaea it jail guard kay Tropa sa Manila.
Suno kana, may lapses sa nasambit nga sitwasyon kon siin ro protocol hay dapat daywang ka bantay ro ma-assign sa sangka inmate kon gina-travel.
Apang ro natabo sigon hay sangka bantay eamang ro kaibahan ni Tropa rason nga nakaangkon man raya it tyansa nga maka-eskapo.
