KALIBO, Aklan—Owa pa it pormal nga pahayag ro pamunuan it Aklan Rehabilitation Center ukon ARC angot sa pagkapaeagiw it sangka inmate kahapon nga adlaw it Martes nga nagapangatubang sa kasong may kaangtanan sa illegal nga droga ag robbery.
Sa pag-imbestiga it bombo kalibo, nasayuran nga owa makaron ro jail warden it pasilidad nga si Pedrito Escarilla kamana man ro anang officer in charge nga si Cherry Custodio.
Sa makaron hay padayun ro pagtugis it mga otoridad sa nag eskapo nga si Randy Fulgencio, presenteng naga-istar sa Purok 3, C Laserna St. Kalibo, apang may address nga Brgy. Mambog, Banga.
Nadiskubre ro pagkaduea it presensiya ni Fulgencio matapos ro ginpatigayon nga head count.
Nag agi raya sa likod nga portion it presuhan pinaagi sa ginsugpon-sugpon nga butong agud nga makaeumpat sa mataas nga pader.
Ro insidente hay insigidang ginpa-blotter sa Kalibo PNP.
Pebrero 2017 kaibahan ro sambilog pang amigo, nadakpan ro inmate matapos nga magpanakaw.
Apang samtang ginadaea sa Aklan provincial hospital agud nga ipaidaeum sa medical examination hay nag-eumpat raya sa patrol car nga nakaposas pa.
Dag-on 2019 hay uman imaw nga naaresto sa pagduso it illegal nga droga kon sa siin narekober sa anang posisyon ag kontrol ro haeos sang gramo it shabu sa Brgy. Mambog, Banga sa sangka buy-bust operation rason nga ginkulong sa ARC.
Bangud sa patong-patong nga kaso, nakaexperiensiya man raya nga mag inom it hilo sa sueod it presuhan rason nga gindaea ag gin confine sa provincial hospital.
