KALIBO, Aklan—Arestado ro daywang ka mga suspek nga responsable sa robbery hold-up nga nag-eontad sa Brgy. Bulwang, Numancia.
Napasaalima it mga kapulisan sa ginpatigayon nga hot pursuit operation ro mga suspek nga sanday Jonito Villafuerte y Dominguez ag Mark Bel Dionito y Yutimo, sa legal nga edad kasunod it madinaeag-on nga pagkaaresto kanda sa Brgy. Jalas, New Washington.
Narekober sa mga suspek ro kwarta nga nagabalor it P67, 680, sangka unit it cellphone ag sanduko.
Samtang, sa exclusive interview it Bombo Radyo sa biktimang si Vebsy Reyes, sa legal nga edad, residente it Brgy. Pusiw, Numancia ag sangka negosyante, nagapauli eon sigon sanda it anang asawang si Michael Reyes kat nataeopangdan ro nakatumba nga motorsiklo sa andang ginaagyan rason nga nagpundo sigon sanda sa pag-eaum nga raya hay sangka disgrasya.
Kaangot kara, ginpaeapitan sigon nanda ro insidente kadungan man sa pagbayo it suspek sa anang asawa ag nagdeklara it hold-up.
Apang, gilayon sigon kara nga nakilaea ro boses it suspek nga andang helper sa andang pwesto.
Madinaeag-on nga nabueo it mga suspek ro anang bitbit nga bag nga may sueod nga mabahoe nga kantidad it kwarta ag mga alahas apang kwarta eamang ro narekober kasunod sa pagkaaresto it daywa.
Samtang, ginbalikan it mga kapulisan ro area kon sa siin ginsugid it daywa nga ginpilak nanda ro bag ag madinaeag-on raya nga nakit-an it mga otoridad ag narekober ro mga nagkaeain-eain nga klase it alahas.
Haom man nga magpasaka it nagakaigong kaso ro mag-asawa kontra sa daywang ka mga suspek nga presenteng nakakulong sa locked up cell it Numancia Police Station para sa nagakaigong disposisyon.
