KALIBO, Aklan–Nagapati ro sangka kilaea ag batikan nga abogado sa Aklan nga artificial shortage eamang sa asukar ro presenteng na-eksperyensyahan it nasyon.
Suno kay Atty. Axel Gonzalez raya hay bangud maabo nga mga nakatago nga suplay sa pilang warehouses sa nagkaeain-eain nga lugar sa nasyon matapos ro ginpatigayun nga raid it Bureau of Costums (BOC).
Gin-insister pa kara nga ro mga middleman ag bentahosong traders ro nagakita it mabahoe sa padayun nga hoarding it asukar.
Dapat suno kana nga indi anay pagpadayunon ro plano it gobyerno nga pag-angkat it asukar sa baylo hay sigidas nga ikasa ro pagsikyar sa mga warehouse it asukar.
Nagapati man si Atty. Gonzalez nga maabu nga tawo ro eakot kara halin sa gobyerno ag pribadong sektor kung siin ro nagapangunang tuyo hay kumita it mabahoe.
Dapat sigon nga mapasakaan it kasong economic sabotage ro mga tawo nga una sa likod it sugar hoarding para mapasabat sa laye.
