Nagsampa ng reklamo si Atty. Manases “Mans” Carpio, asawa ni Vice President Sara Duterte, laban sa ilang opisyal ng pamahalaan kaugnay ng paglalantad ng umano’y financial information sa pagdinig ng House Committee on Justice.
Sa impeachment-related hearing, iniulat ng Anti-Money Laundering Council (AMLC) ang mga “suspicious” at “covered” transactions na aabot sa ₱6.77 bilyon na iniuugnay kina Duterte at Carpio sa loob ng halos dalawang dekada.
Kinasuhan ni Carpio ang mga opisyal ng Bangko Sentral ng Pilipinas, AMLC, at ilang kongresista, at iginiit na ilegal ang paglalabas ng naturang impormasyon nang walang court order at dapat itong manatiling kumpidensyal.
Tinukoy ng kampo ni Carpio ang naturang paglalantad bilang umano’y political harassment at “fishing expedition,” at iginiit na hindi siya saklaw ng impeachment proceedings.
Itinanggi naman ng ilang mambabatas ang alegasyon, at iginiit na ang inilabas ay AMLC report lamang at bahagi ng imbestigasyon ng Kongreso, kaya walang nilabag na batas.
Sinabi rin ng Palasyo na may karapatan si Carpio na magsampa ng kaso, ngunit ang korte ang magpapasya sa merito nito. Nagpahayag naman ang Bangko Sentral na rerepasuhin nila ang reklamo.
Patuloy na pinaninindigan ng House committee na legal at bahagi ng kanilang mandato ang pagtalakay sa naturang isyu sa impeachment inquiry.
