KALIBO, Aklan—Ginpaathag ni Fr. Tudd Belandres, Parish moderator it St. John The Baptist Cathedal ro Kuwaresma hay adlaw it pagpahaum sa pinakasimbolo it pagpalangga, ro pagtau ni Hesus it anang kabuhi sa krus.
Ro pahayag hay may kaangtanan sa nagahilapit nga Ash Wednesday sa Marso 2.
Ginpaathag man ni Fr. Tudd ro kahueugan it kaugalingon nga pagsakripisyo ukon pagpu-asa kada naga-abot ro Kuwaresma.
Sangka kahigayunan man sigon ro pagpu-asa agud nga malimpyuhan ro eawas halin sa sobrang bisyo nga nakakasamad sa tawo ag pag-abuso sa kabuhi.
Pila eamamg suno kana ro daywang klase it pagsakripisyo ro fasting ag abstinence.
Ro miyerkules badlis sigon hay adlaw it obligasyon para sa mga katoliko.
Dikara hay ginabaton ro abo ag dikara man naga-umpisa ro abstinence and fasting.
Sa abstinence suno kana, bawae dikara nga magkaon it karne ag sa fasting hay nagakaon it sangka full meal ag pagkatapis hay daywang small meals.
Bukon sigon it kaibahan sa nasambit nga tradisyon ro mga may sakit ag senior citizen.
Ginpaathag man ni Fr. Tudd ro kahueugan it abo nga gina krus sad ahi it mga katoliko kada Ash Wednesday.
Ro abo hay simbolo sa Bibliya it pagpenitensya.
Dikara gina-aku mo ro pagiging makasae-anan ag gusto mo nga magbag-o.
