KALIBO, Aklan—Nagapadayun ro asphalt patching it Department of Public Works and Highways ukon DPWH sa Eastern ag Western road it probinsiya it Aklan nga nakitaan it mga potholes ukon lubak-lubak.
Raya ro ginpahayag ni Engr. Joey Ureta, maintenance head it DPWH-Aklan sa pihak it limitado nga pondo.
Suno kana ro andang operasyon hay para sa kaeowasan it mga motorista, eabi eon ro mga nagagamit it motorsiklo.
Tuyo man kara nga malikawan ro aksidente sa karsada bangud sa mga buho sa karsada matapos ro mga mabaskog nga pag-uean ko nagtaliwan nga Disyembre.
Dugang pa ni Engr Ureta nga ap-at nga team ro anang gindeploy agud nga magtrabaho sa mga karsadahon nga may mga buho partikular sa Altavas ag Balete.
Maskin suno kana sabado nga adlaw hay ginapa-overtime nana ro anang mga tawuhan agud nga mapadasig ro trabaho.
Ginklaru man nana nga hasta sa makaron hay owa pa nag-abot ro andang pondo para makaron nga 2025 nga nakataeana para sa maintenance works.