KALIBO, Aklan–Magapatigayon it college entrance test ro Aklan State University-Banga Campus para sa mga gustong mag-enroll sa mga kurso ag programa it School of Management Sciences (SMS).
Suno kay Dr. Neptune Tandug, Chairperson, BS in Business Administration ag Chair, Curriculum and Instruction (SMS) nga maga-umpisa ro nasambitan nga college entrance test sa Hunyo 7 hasta 8 it presenteng dag-on.
Ro mga kurso ag programa nga ginatanyag ag pwedeng enrolan it mga qualified applicants hay ro mga masunod;
Bachelor of Science in Business Administration major in Marketing Management, Financial Management, Human Resource Management and Business Economics
Bachelor of Science in Entrepreneurship
Bachelor of Science in Office Administration
Bachelor in Public Administration
Agud nga makapag-enroll kinahangean eamang nga magparehistro pamaagi sa andang website nga mis.asu.edu.ph ag mag-upload it pilang ka mga importanteng dokumento kapareho it Report Card ko Grade 11-First and Second Semester, ag Grade 12-First Semester, Electronic Signature, ag Picture.
Ro pagparehistro hay magatapos sa Mayo 20, 2022.
Pagkatapos kara hay maghueat eamang it text ukon email, ag igapost sa SMS FB Page ro mga qualified nga magabo-oe it exam sa Hunyo 7 hasta 8.
Ro eksaminasyon hay igapatigayon it face-to-face rason nga pagahimuon rayang batch by batch.
Ro mga qualified applicants hay kinahangean nga magpadueong sa Aklan State University-Review Center sa banwa it Banga.
Kinahangean man nga i-download ro staysafe app ag maghimo it account para mas madasig nga transaksiyon.
Samtang, gina-engganyo man ro tanan nga magsunod sa protocol kung gasueod sa nasambitan nga eskuwelahan partikular eun ro pagsuksok it face mask ag pagbitbit it sanitizer ukon alcohol.
Kinahangean man nga bitbiton ro Certified True Copy it Report Card ko Grade 11-1st and 2nd Sem, Grade12-1st Sem. para sa verification.
Samtang dapat man nga magdaea it lapis nga Mongol 1 ukon 2 ag black ballpen.
