Nakalista ro Aklan State University (ASU) it 77.78 porsiyentong passing rate sa Veterinarians Licensure Examination, kun siin 35 nga examinees ro madinaeag-on nga nakapasa.
Suno kay Dr. Jeffrey Arsenal Clarin, presidente it nasmabit nga unibersidad, umabot sa 100 porsiyento ro passing rate it mga first-time takers, samtang 50 porsiyento mat-a sa mga repeaters.
Naging manami sigon ro resulta it unibersidad bangud nga limitado eamang ro numero it mga eskwelahang naga-tanyag it kursong Veterinary Medicine.
Sa makaron, ASU eon lang ro naga-tao it oportunidad para sa nasambit nga programa matapos temporaryong papunduhon ro operasyon it sambilog pang eskwelahan bangud sa mga ginakinahangean nga compliance.
Ginsiguro man it taeatapan it ASU nga padayon nandang paga-giyahan ag pagasuportahan ro mga estudyante, kapin eon ro mga nagabuoe it mga board courses, sa pihak it kakueangan sa pondo.
Nagaeaom man rin si Dr. Clarin nga madugangan ro suporta halin sa gobyerno agud mapamayuad ro mga pasilidad ag serbisyong pang-edukasyon it unibersidad.
Ginpahayag man nana ro andang kasadya sa padayon nga pag-himo it mga dekalidad nga graduates ag pag-produce it mga lisensiyadong beterinaryo nga makabulig sa nasyon.
