Temporaryo nga ginapapundo ni US President Donald Trump ro mga planong pag-atake kontra sa Iran agud nga taw-an it daean ro negosasyon para matuldukan ro nagapadayun nga banggi-anay it US, Israel, ag Tehran.
Sa ginpaguwa nga pahayag, ginpaabot ni Trump nga ginmanduan nana ro militar it Amerika nga indi pagpadayunon ro nakataeanang opensiba apang magpabilin nga haum sa tanan nga oras para sa sangka “full, large scale assault” engkaso nga mapas-eawan ro paghaeambaeang pangkalinungan.
Ginpaguwa ro pahayag matapos sigon nga magpadaea ro Iran it panibag-ong peace proposal sa Washington pinaagi sa Pakistan, suno sa mga Iranian ag Pakistani sources.
Ginkumpirma man ni Iranian Foreign Ministry spokesperson Esmaeil Baghaei nga naipaabot eon sa Estados Unidos ro posisyon it Tehran apang owa nagtau it dugang nga detalye.
Suno kay Trump, ginhinyu it mga lider it Qatar, Saudi Arabia, ag United Arab Emirates nga ipaiway anay ro pag-atake bangud sa pagpati nga posible man nga makaangkon it kasugtanan nga kabaton-baton sa magtimbang nga parte.
Sa pihak kara, nagapabilin nga matig-a ro pahayag it Iran matapos ro anunsyo ni Trump. Nagpaandam ro militar it Iran kontra sa anumang panibag-ong agresyon halin sa US ag mga kaalyado kara ag ginhambae nga haum sanda nga magbaeos.
Suno sa sangka senior Iranian source, nakasentro ro bag-ong proposisyon sa pagpapundo it bakbakan, uman nga pagbukas it Strait of Hormuz, ag paghaeuga it maritime sanctions, samtang ginapaidaeum pa sa masunod nga pag-istorya ro mga sensitibong isyu angot sa nuclear program it Iran.
Nagapabilin nga mahuyang ro ceasefire matapos ro an-um nga domingo nga bakbakan nga nag-umpisa kasunod it US-Israeli airstrikes sa Iran.
Sa pihak kara, nagapadayun sa gihapon ro tensyon matapos ro napabalita nga drone launches halin sa Iraq paagto sa pilang Gulf countries kaibahan ro Saudi Arabia ag Kuwait.
