KALIBO, Aklan—Haum eon nga makipagsambuwa ro mga athletics players it team Aklan para sa paeaabuton nga Western Visayas Regional Athletic Association ukon WVRAA meet sa Abril 26 hasta 30, 2023.
Suno kay Jovie Ote, coach it athletics it team Aklan nga prayoridad nanda ro ikamayad nga eawas it mga atleta eabi eon makaron nga grabe ro kainit it paniempo.
Maga-umpisa sigon ro andang hampang bandang alas-6:00 it agahon hasta alas-8:00 it agahon samtang sa hapon hay alas-3:30 hasta alas-5:30 bilang precautionary measures.
Sa unang adlaw pa eamang sigon hay magapasakop eon sa final games ro andang mga players sa long jump ag shot put samtang ro andang mga runners hay magasabak sa preliminary games nga kaeabanan nga pagahiwaton sa Calangcang sports complex.
Nakataya sigon sa athletics event ro kapin sa 18 nga medalya sa parehong elementary and seconday boys and girls.
Nagaeaum man si coach Ote nga makaangkon it mabahoe nga impact kanda ro home court advantage.
Ro tema makaron nga regional sports meet hay “Championing Excellence through Sports” nga iga-host it Aklan province.
