Nagapahaum eon ro mga Aklanons sa Canada para sa selebrasyon it andang kaugalingon nga bersyon it Ati-atihan Festival sa January 11 sa St. Patrick Hall sa Vancouver.
Raya ro ginpahayag ni Bombo International News Correspondent Dale Lamsen.
Suno kana nga ro dag-unan nga kasadyahan ag ginakabig nga pinakamabahoe nga ati-atihan celebration sa Canada hay gina-organisa it Aklanon Sto. Niňo Association.
Ginaeauman nga kapin sa 400 nga ka indibidwal ro magatambong sa event.
Ginpahayag dugang nga may mga grupo ag banda man nga nagapasakop sa nasambit nga event kun sa siin sanda hay nagasadsad sa patik it tamboe sa sueod it gym ag naga snake dance.
Limang tribu ro ginaeauman nanda nga magapasakop sa makaron nga dag-on.
Sa kamatuoran suno kana hay pilang mabahoe nga karton it costume ro andang gin order halin sa Vikings tribe it Makato.
Maskin nga maeayo sa probinsiya it Aklan hay gusto sigon nanda nga mabatyagan ro kasadya it Ati-Atihan, kilaeang sambilog sa biggest tourist attractions sa Pilipinas bangud sa makolor ag magarbo nga mga costumes.
Antes ro selebrasyon hay nagapatigayon it misa bandang alas-4:30 it hapon ag may anda man nga 9 days novena.
Ro selebrasyon it ati atihan festival sa Canada hay nagabuhay eon it kapin sa 44 anyos .
May gintaeana man sigon sanda it premyo sa top three best Ati-Atihan group costume ag biggest group.
