KALIBO, Aklan—Nagdesisyon ro lokal nga gobyerno it kalibo ag organizers it kalibo sto. niño ati-atihan festival 2021 nga ipaiway anay ro naunang ginkasugtanan nga makaangkon it virtual presentation it pagsadsad ukon merry making it mga tribu ag grupo agud nga maskin paalin hay madayun sa gihapon ro dag-unan nga selebrasyon it festival sa atubang it COVID-19 pandemic.
Suno kay Pook Punong Barangay ag Liga ng mga Barangay President Ronald Marte nga maskin nga nag-confirm eon ro kapin sa 23 nga tribung magapasakop, ginpakamayad nanda nga unahon ro kaeowasan it tanan.
Ginatantiya nga ro kada tribu ag grupong magapartisipar hay ginaeakipan it 18 nga miyembro kaibahan ro iba pang eakot sa produksyon.
Gindugang pa kara nga medyu maabu ro magastos sa kundisyon it Regional Inter Agency Task Force (RIATF) nga ipaidaeum anay sa RT-PCR test ag 14-day quarantine ro tanan nga mga magapasakop antes ro andang performance.
Bangud kara, ginpakamayad sigon nga sundon eon lang ro ginaproponer it RIATF nga magtipon it mga video clips umpisa 1960 hasta 2020 nga selebrasyon it ati-atihan agud nga raya ro ipaguwa mga cable TV networks sa aklan ag social media sa maabot nga enero 16 ag 17.
Posibleng iga-display eon lang suno kana sa ati atihan gallery ro mga na-obra eon nga costume agud nga indi mauyang ro andang gaoy.
Nasayuran nga nagtau ro LGU it kapin sa P15,000 pesos nga subsidy sa kada tribu ag grupo para sa pag-repair it andang mga luma eon nga costumes
Sambilog pa suno kana sa kanseladong aktibidad hay ro fun bike ride nga pagapasakupan it kapin sa 300 nga mga bikers.
Agud nga malikawan ro pagbuhos it mga deboto sa simbahan para sa santos nga misa sa bisperas ag kaadlawan it kapistahan, pagabantayan ag pagasaraduhan ro ibang lugar nga pasueod kara.
Sa pihak nga parte, padayun ro pag-rampa it mga kandidata sa gina-abangan nga “Search for Miss Kalibo Ati-Atihan” ag iba pang aktibidad.
Nag apela man sim arte sa publiko nga padayun nga magsunod sa health guidelines agud nga makalikaw sa deadly virus.
