KALIBO, AKLAN — Panibag-o nga napueo nga secondary ag elementary school teachers ro nakataeanang pagapasidunggan matapos nga mapili-an bilang Aklan’s Ten Outstanding Mentors (ATOM) awards.
Pagabatunon it mga manugturo ro andang natungdan nga award sa sangka seremonya sa Lunes nga adlaw, Abril 17, 2017 bandang alas-9:00 it agahon sa ABL Sports and Cultural Complex .
Ro mga nagdaog sa ATOM award hay magabaton it P20,000 ag plaque of recognition halin sa Razon Tumbocon Foundation ag Department of Education (DepEd).
Ro napueo nga mga manugturo nga kaeakip sa listahan hay sanday Sharon R. Gungon, Master Teacher III it New Washington Elem. School, Armi Joy A. Gonzales, Master Teacher I it Kalibo Integrated Special Education Center, Rosalie L. Rabara, Master Teacher I it Pook Elem. School, Grace F. Nabiong, Master Teacher II it Kalibo Elem. School, Maricel T. Salazar, Master Teacher II it Kalibo Elem. School, Randy D. Bagac, Master Teacher I it Sta. Cruz, Ibajay Elem. School, Alendro P. Arca Jr., Master Teacher I Regional Science High School, Ju-im T. Jimlan, Teacher III it Tanglan National High School, Joel E. dela Cruz, Teacher I it Makato Integrated School ag Boby Rose R. Ricaforte, Master Teacher II it Aguinaldo T. Repiedad Sr., Integrated School.
Ginpili ro ATOM awardee bangud sa andang ginpakita nga kamayad ag kahugod sa pagturo ag community work.
Agud nga makonsidera sa nasambit nga award, ro manugturo hay kinahangean nga gin-nominate it andang school head ag gin-endorso it public schools district supervisor ukon principal in-charge it distrito.
