KALIBO, Aklan—Ginsuhestiyon ni Atty. Axel Gonzales sa sangka ginang nga ipasaka eon sa Aklan Prosecutors Office ro kasong pag-eabag sa RA 9262 ukon Anti-Violence against Women and their Children Act kontra sa anang dating live-in partner nga nagbo-oe sa andang tatlong menor de edad nga unga ag gindaea sa probinsiya it Albay.
Suno kay Atty. Gonzales nga pinaagi sa nasambit nga kaso hay napilitan si Joseph Balbalosa, dating live-in partner it tagreklamo nga si Marilyn Nicolas, tubong Altavas ag presenteng naga-istar sa Brgy. Cauayan, New Washington nga mag-agto sa Aklan.
Raya hay bangud sa igapadaea nga summon kana it korte agud nga mapasabat sa nasambit nga reklamo.
Engkaso nga magapakamatig-a hay paga-arestuhon imaw pinaagi sa warrant of arrest.
Ginpahayag dugang nga engkaso nga magkita ro daywa ag magkasugot nga iga-uli eon lang it eaeaki ro andang mga unga, pwede sigon kara nga iga-atras ro anang demanda, apang kinahangean sa gihapon nga magpangayo imaw it pinansiyal nga suporta para sa andang mga unga.
Posible sigon nga makulong ro eaeaki kon magapamalibad raya nga magtau it financial support sa andang mga unga.
Madumduman nga nauna eon nga nagdangop sa Bombo Radyo Kalibo si Nicolas agud nga magpangayo it bulig kon paalin nga mabawi ro anang mga unga.
2015 hay nagdesisyon imaw nga makipagbueag kay balbalosa bangud sa pisikal ag verbal nga pag-abuso kana.
Nag-uli sigon sanda sa Aklan kaiban ro anang tatlong unga nga kato hay nagapang-edaron pa eamang it daywa, tatlo ag ap-at nga dag-on.
Apang ko 2016 hay nag-apas ro anang dating live-in partner ag ginhueam ro anang mga unga agud nga maging abay sa kasae it anang igmanghud sa Bicol.
Pagkatapos kara hay owa eon ginbalik it dating karelasyon ro andang unga.
Samtang, mabahoe man ro pagpasaeamat ni Nicolas sa legal assistance nga gintau kana ni Atty. Axel Gonzales.
