KALIBO, Aklan—Ginkumpirma ni Atty. Axel Gonzales nga magapadaeagan bilang alkalde it banwa it Kalibo si dating mayor William Lachica ag pagakontrahon kara si mayor Juris Sucro.
Suno kana, nagkaistorya sanda ni Lachica nga gintanyagan pa ro dating alkalde nga magpailihir sa pagkagobernador apang ana sigon nga ginpamalibaran.
Gusto sigon ni Lachica nga mataw-an it igtaeopangod ro mga problema sa banwa it Kalibo kaparehas sa naging masangag ro pag-relocate it mga vendors bangud sa construction it public market, may ginadaing man sigon nga problema ro mga tricycle driver ag maabong iba pa.
Sa ibang sitwasyon it pulitiko hay ginatun-an pa it mga raya kon sa anong position sanda mabutang.
Ginpahayag dugang ni Atty. Gonzales nga maabong nagaguwa nga istorya sa Kalibo kaangot sa pulitika nga makabig nga estratehiya it mga grupo nga magasakdag sa andang tagsa ka mga kandidato.
