KALIBO, Aklan–Pabor ro sangka batikan nga abogado sa probinsya it Aklan sa naging pahayag ni Justice Secretary Jesus Crispin Remulla nga indi dapat mauli sa settlement ro mga kaso it child sex abuse ag incest cases.
Aminado si Atty. Axel Gonzales nga padayun nga nagakatabo sa korte ro pag-areglo it magtimbang nga parte ag pag-atras it kaso matapos nga magbaeayran.
Nagapati imaw nga ro pinakarason it mga kaso it pagpang-abuso hay ro kapobrehon sa nasyon.
Kaeabanan sigon nga eakot sa sekswal nga pagpang-abuso hay ro immediate family ag single parent.
Kinahang-ean sigon nga maangkon ro economic development agud nga indi eon kinahang-ean pa nga magtrabaho sa maeayo nga lugar it ibang ginikanan kamana man nga mabantayan nanda ro andang mga unga.
Base sa datus it Department of Social Welfare and Development (DSWD) halin 2011 hasta 2017, naga-abot sa 2,770 ro andang naireport nga kaso it pagpang-abuso sa mga pamatan-on nga naga-edad limang dag-on ag 14 hasta 17.
Samtang, ko 2019 hasta 2022 hay nakalista ro taeatapan it 815 kaso it sexual abuse.
Ro nasambit nga datus suno kay Atty. Gonzales hay owa pa it napueong porsyento sa kamatuoran bangud owa pa naeakip kara ro mga unreported cases.
Nagakadapat eamang suno kana nga mataw-an it ngipon ro laye ag padayun nga ipakigbato ro tawhanong kinamatarong it kada biktima.
