KALIBO, Aklan—Owa nagapabor si Atty. Axel Gonzales sa ideyang ipaidaeom sa sangka Government-Owned and Controlled Corporations (GOCC) ro ginaduso nga Boracay Island Development Authority ukon BIDA bill.
Suno kana, sa idaeom it GOCC pwede sigon nga mai-sangla ro isla it Boracay.
Manami sigon ro katuyuan it BIDA apang bukon dapat raya it government-controlled body.
Posible sigon nga maeabag kara ro lokal nga otonomiya it LGU-Malay sa pagdumaea it Boracay.
Kapareho it sangka korporasyon, ro magadesisyon hay mga board of directors kung siin posibleng maduea ro check and balance.
Engkaso nga maaprubahan, ro BIDA bilang sangka GOCC ro magadumaea sa Boracay sa sueod it 50 anyos.
Ro proposisyong laye hay nakataeana nga ipaidaeom sa deliberasyon sa plenaryo it Kongreso.
Madumduman nga nauna eon nga gin-aprubahan it Committee on Government Enterprise and Privatization ag Committee on Good Local Government sa Kongreso ro BIDA Bill nga ipaidaeum sa GOCC.
