KALIBO, Aklan–Bukon it pabor si Atty Plaridel Morania, sangka batikang abogado sa Aklan nga mapaeawig sa limang dag-on ro termino it mga barangay officials.
Ginpunto ni Atty. Morania nga pirme man nga nakakaangkon it suspension sa barangay elections rason nga ro mga bukon it huwaran nga opisyales hay may kahigayunan nga magabuhay sa pwesto.
Ginpamilit pa ni Atty. Morania nga dapat nga likawan ro postponement it eleksyon sa barangay bangud nga makasamad raya sa bureaucracy.
Nagaguwa suno kana nga matsa ginapremyuhan it gobyerno ro mga opisyal nga bukon eon it angay ag bagay sa pwesto.
Kinahangean suno kana nga mag alsa eon ro mga pumueuyu engkaso nga uman nga mapaiway ro eleksyon.
Nasayuran nga gusto ni incoming president Bongbong Marcos nga repasuhon ro Local Government Code ag bag-uhon ro termino it mga barangay officials.
Engkaso nga magiging limang dag-on ro termino it sangka barangay official hay pwedeng uman nga magpadaeagan, kun sa siin may maximum raya nga tatlong termino.
Disyembre it makaron nga dag-on hay pagahiwaton ro barangay elections.
