KALIBO, Aklan–Pabor ro sangka batikang abogado sa Aklan sa pagpirma ni Pangueong Rodrigo Duterte sa bag-ong laye nga nagareporma sa Sangguniang Kabataan pinaagi sa pagtau sa mga SK leaders it kada buean nga honoraria ag iba pang benepisyo.
Suno kay Atty. Plaridel Morania nga nagakabagay nga mataw-an it insentibo ro mga indibidwal nga nagahimo it mga programa para sa gobyerno.
Tuyo man sigon kara nga mapabaskog ro andang performance it mga pamatan-on nga lideres.
Sa idaeum it Republic Act 11768, tanan nga mga miyembro it SK hay pagabayaran it honorarium kada buean.
Ro kwarta hay igabawas halin sa pondo it SK.
Nakabaehag pa sa laye nga ro 10% it general fund it barangay hay dapat nga itaeana para sa andang SK.
Ro pondo nga pagagamiton para sa youth development ag empowerment programs hay kinahangean nga bayaran it lump-sum it Sangguniang Barangay.
