KALIBO, Aklan—Gin-umpisahan eon ro pagbakuna kontra COVID-19 sa nasyong Australia sa mga unga nga naga-edad it lima hasta 11 anyos gamit ro Pfizer.
Suno kay Bombo International Correspondent Denmark Suede it Australia nga sa kabilugan nga 657,000 dosage nga naiturok nga bakuna sa nasambit nga age group hay haeos 240 eamang ro nailistang nakaangkon it adverse effect.
Uman nga nagpanindugan si suede nga ro vaccination ro pinakamayad nga pamaagi agud nga mapanaba ro peligro it mga unga sa pag-angkon it grabeng sakit tuga it deadly virus.
Ginrekomenda sigon it Australian Technical Advisory Group on Immunisation ro pediatric Pfizer COVID-19 vaccine para sa nasambit nga edad.
Sa makaron hay nag-applay eon man sigon ro Pfizer it emergency use authorization ukon EUA para sa bakuna sa mga naga-edad it 6 nga buean hasta sa ap-at nga dag-on.
Ginpaathag pa ni Suede nga ro mga inunga nga may pre-existing conditions hay may mabahoe nga paeag sa pag angkon it grabeng epekto it COVID-19, kaibahan ro mga unga nga may type 1 diabetes, obesity, history it prematurity, heart disease, immunocompromising conditions, ag complex ag chronic illnesses.
Sa pihak nga parte, naga abot sa 8.19 million doses it Pfizer, Moderna ag Astrazeneca ro naiturok nga booster shots sa mga Australians.
Nagapueong sigon makaron ro national cabinet agud nga makasugtan ro final resolution nga ro full vaccination hay nagatumod sa mag-eowas nga nakaangkon it 2 doses hay may booster shot pa.
Nagapabilin man sigon nga sarado ro border it Western Australia hasta nga indi mataw-an it booster shots ro 80% it andang populasyon.
Nagapabilin man suno kana ro patakaran makaron sa nasambit nga nasyon nga ginpabalkod it andang supreme court nga owa it pieilitan ro pagbakuna sa mga trabahador apang kon owa it bakuna hay indi makasueod sa trabaho.
