KALIBO, Aklan–Nagdaog bilang bag-ong Prime Minister it Australia si Anthony Albanese sa idaeom it labor party sa ginpatigayun nga eleksyon ko Mayo 21.
Ginpahayag ni Bombo International Correspondent Denmark Suede it Sydney, Australia nga may kabilugan nga 151 electoral seats ro andang nasyon kung siin ro unang makabuoe it 76 seats hay imaw ro magadaog.
Kung sin-o man sigon ro lider it partido hay imaw ro magiging masunod nga Prime Minister.
Suno kay Suede mabahoe ro kinaiba sa pagdumaea it labor party ag liberal party.
Ginakabig sigon nga magastos it Labor party bangud mahilig sanda nga maggamit it kwarta pinaagi sa social system it gobyerno samtang ro Liberal part hay naka-sentro sa pagbilog it negosyo, imprastraktura ag strikto pag-abot sa immigration.
Madumduman nga nag-concede eon si Outgoing Prime Minister Scott Morrison matapos nga mapas-eawan sa eleksyon.
Sa pihak kara, nagapabilin sigon imaw nga “proud” sa mga polisiya nga anang ginpatuman sa tyempo it anang pagserbisyo.
