KALIBO, Aklan–Uman nga nagtao it donasyon ro Australia sa nasyon nga Ukraine bilang dugang nga armas agud nga sok-ean ro ginahimo nga pagpang-atake it Russia.
Suno kay Bombo International Correspondent Denmark Suede it Sydney, Australia nga bilang sabat sa panawagan it US sa pilang ka mga nasyon nga magtao it dugang nga bulig sa Ukraine hay nagpadaea it kapin sa an-om ka mga cannon ro Australian government nga makasarang nga mag-atake it target sa kapin sa 30 kilometro it eayo.
Ro nasambitan nga donasyon hay nagabalor it 26.7 million US dollars.
Bangud kara may una eun nga kabilugang 225 million Australian dollars nga military aid ag 65 million Australian dollars nga humanitarian aid ro naipadaea it Australia sa Ukraine umpisa nga natabo ro kinagamo.
Samtang, padayun man ro pagpasiguro it gobyerno sa Australia nga magatao sanda it suporta sa Ukraine hasta nga owa pa naga-ungkat ro giyera.
