KALIBO, Aklan—Padayun pang gina-imbestigahan it mga opisyales it barangay ro nagakatabo nga rambol sa tunga it mga pamatan-on it Brgy. Tigayon ag Brgy. Tinigaw, Kalibo.
Suno kay Punong barangay Lourdes Reyes it. Tinigaw, Kalibo nga makapilang beses eon imaw nga nakabaton it report angot sa pagrambolan it mga menor-de-edad maeapit sa estaka nga sakop it Brgy. Tigayon.
Ro pinakaulihi sigon hay ko adlaw it Dominggo kun siin personal nga gin-adtunan ni Kapitan ro lugar kaibahan ro mga tanod ag pilang opisyal it Brgy. Tigayon apang pag-abot idto hay owa eon ro mga imbolbado.
Ginasugid nga away sa babaye ro ginhalinan it mga kinagamo.
Ko Lunes kat ginpatawag sigon kara ro mga pamatan-on kaibahan ro andang mga ginikanan agud nga maistoryahan ag maayos ro problema.
Mabahoe suno kana nga pangutana kung ham-an nakaguwa it andang panimaeay ro natungdan nga mga menor-de-edad sa tunga it mga paghugut tuga it pandemya.
Nakataeana man sigon sanda nga magpatigayun it pueong ni Tigayon Punong Barangay Gil Morandante agud daeayon eon nga ma-settle ro isyu sa tunga it magtimbang nga parte.
Samtang, suportado man ni Kalibo Sangguniang Bayan member Augusto Tolentino ro tikang nga ginahimo it mga opisyal it daywang ka mga barangay agud nga ma-settle ro nagakatabo nga kinagamo.
Suno kana, dapat nga insigidang maaksyunan ro problema agud indi eon raya mauman ukon magbahaoe pa.
Nagpaandam man raya nga posibleng makaulong ag mapasakaan it kaso ro mga imbolbadong indibidwal nga una eon sa legal nga edad kamana man ro mga ginikanan it mga menor-de-edad nga eakot kara.
Nagaeaum si Tolentino nga maresolba eon ro bagina sa tunga it daywang grupo it mga pamatan-on.
